Dalawang aktres na dekada na ang friendship, nawasak sa kataklesahan

May matinding hidwaan palang nagaganap ngayon sa pagitan ng dalawang babaeng personalidad na dekada na ang binibilang ng pagkakaibigan.

Magkasama sila sa halos lahat ng laban, magkahawak-kamay sila sa makapal at sa manipis, sa pagbagsak at pagbangon at sa anumang pagkakataon.

Pero may naganap na hindi kinayang tiisin ni Actress A na mas popular kesa kay Actress B. May mga kaibigan nang umaayos sa kanilang problema pero tumatanggi pa si Actress A na tanggapin uli si Actress B sa buhay niya.

Kuwento ng aming source, “Madaling magpatawad si Actress A, kahit nga ang mga taong nangmaliit sa kanya nu’n, e, kinaya niyang mapatawad.

“Kahit ang mga nanghusga nu’n sa pakikipag­relasyon niya, e, kinaya niyang matanggap uli, kaya nakapagtataka kung bakit hindi niya matanggap-tanggap itong si Actress B na kaibigan pa naman niya!” madiing unang kuwento ng aming impormante.

Malalim daw ang dahilan dahil hindi lang si Actress A ang nasaktan kundi pati ang kanyang karelasyon. Okey lang sana kay Actress A kung siya lang ang sinaktan ni Actress B.

Balik-kuwento ng aming source, “Bakit kaya palaging may nakakabangga itong si Actress B? Palagi siyang nalalagay sa alanganin, may pagkataklesa kasi ang babaeng ‘yun, e!

“Naalala n’yo pa ba nu’ng ituring siyang persona non grata sa isang probinsiya? Ganu’n din ang kuwento, ang matabil niyang dila, ang pagiging taklesa niya!

“May nalaman kasi si Actress A na pinagsasabi ni Actress B. Bakit nga naman ganu’n, di ba? Magkaibigan naman sila na nagsasabihan ng halos lahat ng nararamdaman nila, pero bakit hindi na lang siya kinausap nang diretso ni Actress B?

“Naku, masakit nga naman ang i-betray ka ng taong itinuturing mo nang parang kapatid, traydurin ka na ng ibang tao, huwag lang ang pinagkakatiwalaan mong friend!

“’Yun ang dahilan kung bakit matagal na silang hindi nag-uusap. Tumatawag si Actress B kay Actress A, pero hindi siya sinasagot!

“Masamang-masama pa kasi ang loob sa kanya ni Actress A, nagpahupa pa siya ng galit, dahil nadamay sa issue pati ang boyfriend na politician ni Actress A!

“Tama lang ang sinabi niya, kailangang may matutuhang leksiyon si Actress B sa nangyari sa kanila. Hindi basta-basta tinatanggap at pinababayaan ang mga taong hindi marunong magpahalaga sa friendship!

“Hindi matamis sa panlasa ni Actress A ang iniaalok na candy ni Actress B! Maasim ‘yun! Baka iluwa lang niya!” madiing pagtatapos ng aming source.

Ubos!

Vice Ganda at Sec. Roque, maingay ang tapatan

Hating-hati ang reaksiyon ng mga netizens sa social media tungkol sa nagaganap na parinigan ngayon nina Presidential Spokesperson Harry Roque at Vice Ganda.

Sabong panlaba at bakuna ang pinag-ugatan ng kanilang patambisan. Naunang sinabi ng tagapagsalita ng pangulo na huwag nang ­maging choosy pa sa bakuna dahil ang mahalaga ay aangkat na ang ating pamahalaan ng vaccine para sa kaligtasan ng publiko.

Sinagot naman ‘yun ni Vice Ganda na ang linya ng katwiran ay kung sa pagbili nga lang ng sabong panlaba ay pinipili na natin sa merkado ang pinakamaayos, sa bakuna pa kaya, ano raw ‘yun? Basta may maisaksak lang?

Tinablan-napikon si Spokesman Harry Roque, kaya ang iginanti nito ay sa mga eksperto raw tayo naniniwala, hindi sa mga komed­yante.

Pinagpistahan ang kanilang parinigan sa social media, maraming nakakaintindi sa tagapagsalita ng pangulo na tagapagpalaganap lang naman ng mga impormasyon, may mga kumakampi rin kay Vice Ganda na ayon sa mga nagkokomento ay nagpapakatotoo lang naman.

May isang netizen na nagkomento, “Ang mga baklang twoooohhhh!!!! Magsitigil na nga kayo! Ang una n’yong pahalagahan, e, ang kaligtasan ng mga Pinoy, hindi ang mga kuda n’yo!”

Nagmimistulang palengke ang ratratan ng mga maka-Vice at makagobyerno, parang nasa talipapa lang daw kasi ang nagkokontrahang kampo nang dahil sa bakuna, ipinaglihi raw pala sa patola si Secretary Harry Roque dahil mahilig itong pumatol sa mga kumokontra sa kanila.

Pareho lang namang may punto ang ipinaglalaban nila ni Vice Ganda, para naman sa kapakanan ng ating bayan ang kanilang hangad, kaya sana’y magkasundo na lang sila.

Iba talaga ang panghalina ng showbiz. Naaapektuhan ng mundo ng mga artista ang mga pulitiko. At nagbibigay rin ng reaksiyon ang mga personalidad tungkol sa nagaganap sa ating bayan.

Pare-pareho lang silang mulat sa mga nagaganap.