Westbrook nagpositibo sa COVID-19

Duha sab ka NBA players naigo sa virus didto sa Orlando

CEBU, Philippines — Gikompirmar sa NBA kagahapong adlawa nga duna sila'y duha ka players nga nagpositibo sa coronavirus sukad ang mga teams nagsugod og pangabot didto sa Orlando, Florida diin tiwason sa liga ang nahibiling bahin sa naputol niining season sugod karong Hulyo 30.

Segun sa opisyal nga pamahayag sa NBA nga sa 322 ka players nga gi-test didto sa NBA Campus sa Disney World sukad niadtong Hulyo 7, duha lamang ang nagpositibo. Giklaro sa liga nga ang maong mga players wala pa makakumpleto sa ilang kwarantin nga mao unta ang makapasud kanila sa 'bubble' nga giplastada NBA aron proteksiyonan ang panglawas ug kaluwasan sa tanan. Ang maong mga players mibiya na sa Disney World Campus ug nagkwarantin na.

Sukad nagsugod og test ang NBA niadtong Hulyo 1, miabot na ngadto sa 19 ka players ang nagpositibo sa virus.

Apil na niini si Houston Rockets star Russell Westbrook nga kahagapon lamang mipahibawo nga nataptan siya sa maong sakit.

Si Westbrook, ang 2017 Most Valuable Player ug usa sa labing bug-at nga mga pangan sa NBA, nagkanayon nga nagkwarantin na siya ug maayo na ang iyang paminaw.

"I tested positive for COVID-19 prior to my team's departure to Orlando," suwat pa ni Westbrook sa iyang Twitter. "Please take this virus seriously. Be safe. Mask up!"

Si Westbrook usa sa pipila ka players sa Rockets nga wala mobiyahe uban sa team didto sa Orlando. Ang uban mao sila si James Harden ug Luc Mbah a Moute. Masaligon hinuon si Houston coach Mike D'Antoni nga maabot ra ang iyang mga bitoon sa Orlando sa dili pa magsugod og balik ang liga.