Bayad sa sine mas mura na, first day-last day sa mga sinehan bawal na!

Maraming nagbubunyi sa inilabas ng Film Development Council of the Philippines (FDCP) na Memorandum Circular (MC) No. 2019-01 na Policies and Guidelines on the Theatrical Release of Films in Philippine Cinemas matapos ang consultations kasama ang film industry stakeholders at ang publiko na tuwing Biyernes na ang theatrical release ng local and foreign films sa buong bansa para mas ma-accommodate ang maraming potential moviegoers sa weekend.

“Ang Memorandum Circular na ‘to ang culmination ng pagsisikap ng FDCP para mapatatag ang industry practices at antas ng playing field para sa lahat ng aming stakeholders. Sa pamamagitan ng transparent at fair set ng guidelines na nag-address ng gaps na matagal nang salot sa industriya sa pagpapalabas ng mga pelikula sa commercial theatres,” sabi ni FDCP Chairperson Liza Diño.

Pagkatapos nga ng formal at matagal na consultations kasama ang producers, theatres, at distributors para i-draft ang nilalaman ng guidelines, nagkaroon ng public consultation kasama ang stakeholders na ginanap noong Abril 25, 2019 sa Cinematheque Centre Manila. Dumalo rin sa dialogues at nagbigay ng suporta sa pag-develop ng guidelines ang partner government agencies ng FDCP, gaya ng Department of the Interior and Local Government (DILG), Movie and Television Review and Classification Board (MTRCB), Department of Trade and Industry-Export Management Bureau (DTI-EMB), at Office of the Presidential Legal Counsel and Spokesperson.

Magkakaroon din ang bawat booked film para sa theatrical release ng minimum run-length na hindi bababa sa pitong araw, pati na rin ng theater assignment guarantee para sa unang tatlong araw para maiwasang ma-pull out ang mga pelikula. Meaning walang first day-last day na pelikula sa mga sinehan.

May itatakda ring “full screens” para sa booked films para sa unang tatlong  araw ng kanilang exhibition. Ipagbabawal ang “screen splitting,” o double booking at exhibition para sa single theatre screen.

Susundin ang pagkakaroon ng isang equitable ratio sa pagitan ng Filipino at foreign films sa regular playdates para bigyan ang local films ng mas mataas na pagkakataong mapanood, maliban kung mayroong national film festival, gaya ng Pista ng Pelikulang Pilipino (PPP) at Metro Manila Film Festival (MMFF).

Kasama sa nasabing MC para mahikayat ang mga kabataang manood ng local films sa mga sinehan, ang recommended national average movie ticket prices na rin kada Miyerkules para sa mga estudyanteng may edad na 18 pababa ay magiging Dalawang Daang Piso (P200.00) sa Metro Manila, at ang maximum na presyo sa mga probinsya ay magiging Isang Daan at Limampung Piso (P150.00).

Magsisimula ito next month.