Nadine tuloy sa pagiging Makiling!

SEEN: Dinala kahapon ni Nadine Lustre sa victory presscon ng Viva Artists Agency para sa kanya ang best actress trophy niya mula sa 67th FAMAS. Maligaya si Nadine sa recognition ng FAMAS para sa performance niya sa Never Not Love You. Napangiti si Nadine sa opinyon na baka maka-grandslam siya bilang best actress dahil siya rin ang best performer ng Young Critics Circle.

SCENE: Pinasalamatan ni Nadine ang kanyang boyfriend na si James Reid dahil sa full support nito sa kanya. Si James ang nagpapalakas ng loob niya tuwing nawawalan ito ng self-confidence. “I told you so” ang reaksyon ni James nang malaman nito na si Nadine  ang nanalo. Bago nagpunta si Nadine sa Meralco Theater, ang venue ng 67th FAMAS noong April 28, sinabi sa kanya ni James na siya ang mananalo.

SEEN: Nagpasalamat din si Nadine sa mga nagsasabi na siya ang perfect para magbida sa Darna movie ng Star Cinema. May auditions para sa mga aktres at kababaihan na interesado na gumanap na Darna. Payag si Nadine na sumali sa audition, basta may approval ang talent management agency na namamahala sa showbiz career niya.

SCENE: Tiniyak ni Nadine na matutuloy ang pagganap niya bilang Maria Makiling sa Pedro Penduko movie na pagbibidahan ni James Reid pero hindi pa mauumpisahan ang shooting dahil mabusisi ang pre-production preparations.