Barbie at Mika pinagseselosan ang sobrang closeness!

Pakiusap ni Ms. Hazel Abonita, ang Program Unit Manager ng bagong drama series ng GMA 7 na Kara Mia na sana baguhin daw ang habit ng panonood ng TV sa primetime dahil bago itong ihahain nila sa GMA Telebabad na pinagbibidahan nina Barbie Forteza at Mika dela Cruz.

Sa February 18 na magsisimula pagkatapos ng 24 Oras, kaya matindi ang makakatapat nila.

Sabi naman ni Barbie, ayaw na lang daw niyang magpa-pressure, sa halip ay nai-excite siya sa kakaibang kuwento ng bago niyang drama series. “Ayokong isipin ‘yung kumpetisyon kasi mas lalo lang akong mapi-pressure.

“Nung unang ini-offer naman sa akin ‘tong Kara Mia, wala naman pong timeslot. As in show lang talaga na walang timeslot.”

Ang na-enjoy daw niya nang husto rito ay ang bonding nila ni Mika na sabi nga ni Jak Roberto na kasama rin dito, parang gusto na raw niyang magselos sa closeness ng dalawa. “Pareho silang may bakod na sila lang nagkakaintindihan. Pag lumapit ka, hindi mo sila maistorbo, kasi pareho silang may girl stuff,” pakli ni Jak.

Sabi naman ni Barbie, tingin daw niya hindi sila magkakaproblema o magkaka-isyu ni Mika dahil iba na raw talaga ang closeness nila ngayon. “Si Mika yung tipo ng tao na walang bahid ng showbiz sa katawan. Napakatotoong tao niya. Alam n’yo naman ako. So, pag ganun ang tao sa akin mahal ko talaga. Alam kong ‘ay magiging kaibigan ko to,” pakli ni Barbie.

Sabi naman ni Mika : “Si Barbie, para siyang ate ko. Grabe siyang maasikaso, maalaga, magkasundo kami. Maraming bagay na magkaparehas kami pero may mga bagay na may kanya-kanya din kaming gusto.

“Pag nag-regional kami at magkasama kami sa kuwarto, grabe. Ilang goodnight na kami, maya-maya may naalala siya, kuwentuhan uli. Umabot kami ng alas-tres na gising pa rin siya. Iba na yung bonding namin eh. Para kaming magkapatid na bata.”

Jak gustong mag-audition kahit may frontal nudity!

Doon pa rin sa presscon ng Kara Mia, nabanggit din ni Jak na hindi raw siya gaanong magta-topless at magpapakita ng abs dito. Ginawa na raw niya dati sa Contessa, at ngayon daw ay hindi na siya gaanong pinag-topless sa Bubble Gang o kaya sa Dear Uge.

“Siguro pinagpapahinga na lang muna,” pakli ni Jak.

Pero gusto na rin ng Kapuso actor na mag-movie at okay lang daw siya magpaka-daring.

Tinanong namin kung gagawin ba niya ang isang magandang film project, pero may frontal nudity? “Why not? Kung ang direktor saka yung script po maganda, bakit hindi? Sa time ngayon, mas gusto ko na rin mag-pelikula eh,” deretsong sagot ni Jak.

May nakita nga raw siya sa Facebook na naghahanap ng artista sa isang pelikula na may maselang tema at kailangan ang frontal nudity, gusto raw sana niyang magpa-audition, pero hindi lang daw siya pumuwede sa araw ng audition.

Former beauty queen, umamin sa relasyon sa pulitiko

Deretso rin ang sagot sa amin ng dating Ms. World-Philippines 2012 na si Queenie Rehman na nagkaroon sila ng relasyon ng Sta. Rosa, Laguna Mayor Dan Fernandez, pero hindi na raw sila ngayon.

Ipapakilala si Queenie sa horror movie ng Reality Films na Second Coming na dinerek ni Jet Leyco at pinagbibidahan ni Jodi Sta. Maria kasama si Marvin Agustin at Kapuso child actress Angelica Ulip.

Medyo natagalan ito bago nila natapos dahil sabi ni direk Jet, hindi raw mapagtugma ang schedule ng mga pangunahing artista. Kaya parang two years in the making daw ito.

Hindi niya itinangging si Mayor Dan ang nagpakilala sa kanya kina Dondon Monteverde sa Reality at kinuha nga siya. “He actually helped to be part of this group. We’re friends na lang now,” tipid na sagot sa amin ni Queenie.

Gustong subukan ni Queenie ang pag-arte, dahil sa pagkanta raw talaga siya nalilinya.

May inaayos na nga raw na single si direk Joven Tan para sa kanya at ipapasok daw sa Spotify.

Magaling din siyang mag-beatbox, at ito nga raw ang talent na na-perform niya nang sumali siya sa Ms. World-Philippines 2012.

Ngayon ay huhusgahan na siya sa Second Coming na magsu-showing na sa February 27.