Happier and healthier

Kitang tanan ganahan nga malipayon ug maayo ang panglawas. Ang musupak, dakong bakakon! Hahaha. Bitaw, aniay akong nakuykuyan gikan sa www.iheartintelligence.com kabahin sa pito matud pa nga mga gimbuhaton sa malipayon ug baskog nga mga tawo sa ilang pagmata sa sayo nga kabuntagon:

1. Muinom og usa ka baso nga tubig sa pagmata. Makapalagsik matud pa ang tubig kanimo ug makatabang usab kini aron manindot ang imong digestion. Mas nindot kun imong pug-an og lemon o sagulan og usa ka kutsarita nga apple cider vinegar.

2. Pasingot. Kini pinaagi sa paglihuk sa imong lawas. Wala kini nagpasabot nga kinahanglan gyud ang todo nga workout sa dili pa mamahaw, kundili mao nga lihukon nimo ang imong lawas pinaagi sa stretching. Mahimo sab ka nga musayaw.

3. Magmapasalamaton. Paghunahuna og usa ka butang nga angayan nimong ipasalamat. Kun muabot og lima, mas labing maayo.

4. Pamahaw og tarong. Buot pasabot, kaon og sakto nga pamahaw ug ayaw pagsalig og instant cereal. Itlog, oats nga gipabukalan gyud ug smoothies nga dali lamang andamon maoy mga maanindot nimong kapilian para sa pamahaw.

5. Ayaw paggamit og gadget sulod sa usa ka oras. Dili maayo nga mag-check ka sa imong emails o mutan-aw sa imong Facebook newsfeed sa imong pagmata. Palabya usa ang usa ka oras, una kini nimo buhaton. Mabantayan nimo nga mas focused ka ug tin-aw ang imong panghunahuna sa tibuok adlaw.

6. Gawas ug hanggab. Buot pasabot, gawas sa imong balay, ug hanggab og hangin. Kini mupahinumdom nimo nga buhi ka pa ug angayan ka nga magmapasalamaton.

7. Say your affirmations. Atubang sa samin ug sultihi imong kaugalingon og something positive. Ako I remember now nga sa una muatubang ko sa mirror ug mulenggua: I am becoming more beautiful each day. Pakkk! Kamo pagmugna sab mo og inyong affirmation kay wala ni but-anay ug ikaw ray makadungog. Pakpak!