Police investigator sa Cabanatuan, itinumba!

MANILA, Philippines — Pinagbabaril hanggang sa mapatay ang isang imbestigador ng pulisya ng hindi pa nakilalang salarin malapit sa isang fast food restaurant sa kahabaan ng Emilio Vergara Highway, Brgy. Sta. Arcadia, Cabanatuan City, Nueva Ecija kamakalawa ng gabi.

Kinilala ang biktima na si P/Corporal Joseph Toribio, miyembro ng Drug Enforcement Unit (DEU) ng Cabanatuan City Police at residente ng Sta Rosa, Nueva Ecija.

Sa imbestigasyon, bandang alas-9 ng gabi habang nasa bisinidad ng nasabing lugar ang biktima nang biglang sumulpot ang salarin. Bigla na lamang naglabas ang suspek ng baril at pinagbabaril ang pulis.

Nagresponde naman ang mga kapwa nito pulis at naabutang nakasubsob ang mukha sa kalsada ng duguang biktima na dead-on-the-spot sa insidente.