Barangay chairman todas sa ambush!

COTABATO CITY , Philippines - Patay sa mga tama ng bala ang isang barangay chairman matapos tambangan ng armadong grupo sa highway sa Purok Inanama sa Barangay Poblacion, Lambayong, Sultan Kudarat nitong Sabado Ng hapon.

Sa ulat ng mga local executives at Lambayong Municipal Police, sakay ng kanyang puting Toyota D4D van si Esmael Palaguyan Sambilan, chairman ng Barangay Lagao sa Lambayong, nang tambangan at pagbabarilin ng mga armadong lalaking sakay ng mga motorsiklo na mabilis na nakatakas.

Agad na nailabas ng mga emergency res­ponders si Sambilan sa kanyang van, may plakang AEC 2311, at isinugod sa pagamutan ngunit namatay rin kalaunan dahil sa mase­lang mga tama ng bala na kanyang tinamo sa ambush.

Ayon sa mga officials ng Sultan Kudarat Provincial Police Office at ng Police Regional Office-12, kilala ang napaslang na si Sambilan sa kanyang masigasig na suporta sa operations ng kanilang mga anti-narcotics unit sa Barangay Lagao.

Ayon sa kanyang mga kamag-anak at mga senior officials ng PRO-12, lantarang sumasama si Sambilan sa mga police narcotics entrapment operations at sa mga paghahain ng mga warrants of arrest sa mga wanted sa mga criminal cases na nagtatago sa Lambayong.