2 bahay inararo ng van: 3 patay, 2 sugatan!
CAMP NAKAR, LUCENA City, Philippines —Tatlo ang kumpirmadong patay habang dalawang iba pa ang nasugatan makaraang araruhin ng isang van ang dalawang bahay sa gilid ng highway sa Barangay Abuyon, San Narciso, Quezon noong Sabado ng hapon.
Batay sa ulat ng San Narciso Municipal Police Station kay Quezon Police Provincial Office (QPPO) Director PCol. Romulo Albacea, bandang alas-4:30 ng hapon habang minamaneho ni alyas “Efren”, 45-anyos, tricycle driver mula Santa Lucia, Santa Ana, Pampanga, ang isang Hyundai Starex van kasama ang apat na pasahero nang mawalan siya ng kontrol sa manibela at tuluy-tuloy na bumangga sa magkatabing bahay sa gilid ng kalsada ng Sitio Pantay sa Barangay Abuyon.
Mabilis na naisugod sa Quezon Provincial Hospital Network sa San Narciso ng mga responders ang mga biktima ngunit idineklarang dead-on-arrival ang mga biktima na kinilala lang sa mga pangalang Florencio, 62; Merelyn, 57; kapwa residente ng nasabing barangay, at ang mismong drayber na si Efren dahil sa mga grabeng pinsalang tinamo sa kanilang mga ulo at katawan.
Samantala, ang mga sugatan na sina alyas “Joey”, 46, ng Batangas, at “Mary Jane”, 48, ng Pampanga ay ginagamot ngayon sa nasabing ospital.
Dahil sa pagragasa ng van, nasira ang mga bahay na pag-aari nina Charlie Abadilla Rivano, 49, at Dionisio Boc Cabalan, 38, ng nasabing barangay.
- Latest
