3 magkakaibigan nalunod sa ilog

MANILA, Philippines — Hanggang sa huli ng kanilang buhay ay magkakasamang nasawi ang tatlong magkakaibigan nang sila ay malunod habang naliligo sa ilog sa Brgy. Sisim Alto, Tumauini, Isabela, ayon sa ulat kahapon.

Ang mga biktima ay tinukoy lamang sa mga pangalang Rayver, Samson at Vince; pawang mga residente ng ­Isabela.

Sa ulat ng Isabela Police, ang mga biktima ay nagkayayaang mag-picnic at maglangoy sa Avvu River noong Martes sa Brgy. Sisim Alto, Tumauini ng lalawigang ito.

Nadiskubre ang insidente matapos isang residente sa lugar na makita ang isa sa mga biktima na lumulutang sa nasabing ilog ilang oras matapos ang mga itong malunod.

 Sa isinagawang search and rescue ­operation ng mga otoridad ay narekober naman ang dalawa pang biktima sa ilalim ng ilog.

Agad na isinugod ang mga biktima sa Tumauini Community Hospital pero idineklara na ang mga itong dead-on-arrival.