Pasahero ng tricycle, dedo sa bangga ng van

CALAUAG, Quezon, Philippines — Hindi na umabot ng buhay sa ospital ang isang pasahero ng tricycle habang malubhang nasugatan ang driver at isa pang pasahero matapos na sila ay banggain ng kasalubong na delivery closed van sa Maharlika Highway na sakop ng Barangay Vinas sa bayang ito, kamakalawa ng madaling araw.

Kinilala ng pulisya ang nasawing biktima na nagtamo ng grabeng pinsala sa ulo at katawan na si ‘Arvin’, 29, obrero ng Barangay Kuyaoyao.

Kasalukuyan namang ginagamot sa Magsaysay District Hospital sanhi ng mga sugat sa ulo at iba’t ibang parte ng katawan ang trike driver na si Michael, 41 ng Barangay Vinas at ang isa pang pasahero na si ‘Damiel’, 28,ng Barangay Pinagbayanan.

Sa imbestigasyon ng Calauag PNP,bandang alas-5:10 ng umaga ay binabagtas ng tricycle driver na si Michael ang kahabaan ng Maharlika Highway at pagsapit sa kurbada ay tinangka nitong iwasan ang kasalubong na Hino van na minamaneho ni Elmer,49 ng Meycauayan, Bulacan,subalit nahagip ang driver seat kaya’t  tumilapon ang lahat ng nasa tricycle.

Nahaharap sa kaukulang reklamo ang driver ng closed van na nakapiit sa municipal jail.