Magdyowa timbog sa P.5 milyong shabu buy-bust

CAVITE, Philippines —  Nalambat ng pulisya ang mag-lover na hinihinalang drug pushers sa inilatag na buy-bust operation kamakalawa ng gabi sa Brgy. San Agustin 3, Dasmariñas City.

Kinilala lang ng pulisya ang mga suspek sa mga alyas na “Rommel” at “Angel”, kapwa nasa hustong gulang, residente ng nasabing lugar at kilalang umanong mga bigtime drug pusher at nasa High Value Individual (HVI) list ng Cavite Police.

Ayon kay Cavite Police Provincial Office Director P/Col. Dwight Alegre, alas-8 ng gabi nang ikasa ng Drug Enforcement Team, Dasmariñas Component City Police at Philippine Drug Enforcement Agency (PDEA) ang buy-bust laban sa magdyowang suspek.

Dinakma ang dalawa nang makuhanan ng 5 piraso ng selyadong plastic sachet na naglalaman ng shabu na aabot sa timbang na 64.04 gramo at may halagang mahigit sa P500,000.

Narekober rin sa mga suspek ang ilang drug paraphernalia at buy-bust money na ginamit sa operasyon.