Lalaki na wanted sa kasong murder sa Cavite, tiklo sa Laguna

MANILA, Philippines — Isang most wanted ng Regional Level sa lalawigan ng Cavite ang naaresto ng mga otoridad sa San Pablo City, Laguna, kahapon ng umaga.

Kinilala ni Police Major Hilario G Lacaste Jr., ang naarestong suspek na si alyas ‘Joshua’, nasa hustong gulang, residente ng Brgy.Lumipa, General Emilio Aguinaldo, Cavite.

Ayon kay Cavite Provincial Director Police Col Dwight Alegre, alas-11:40 ng umaga nang magkasa ng warrant operation ang Gen. Emilio Aguinaldo Police sa Barangay San Rafael, San Pablo City, Laguna matapos na makatanggap ng impormasyon na dito nagtatago ang suspek.

Inaresto ang suspek sa bisa ng warrant of arrest na inilabas ng Regional Trial Court, Branch 135, Tagaytay City, Cavite, para sa kasong murder (Art. 248 ng Revised Penal Code) sa ilalim ng Criminal Case No. TG-25-348.