‘Akyat-Bahay’ todas sa off-duty cop!
MANILA, Philippines — Patay ang isang pinaghihinalaang miyembro ng Akyat-Bahay gang matapos pagbabarilin ng isang off-duty na parak matapos namang mahuli sa akto na pinagnakawan ang kanilang kapitbahay sa Brgy. Malino, Mexico, Pampanga, ayon sa ulat nitong Sabado.
Sa report ng Police Regional Office (PRO) 3, nangyari ang insidente nitong Biyernes dakong alas-3:45 ng madaling araw.
Ayon sa imbestigasyon, nasaksihan ng ama ni Patrolman Rey Lemuel Zabat, 29-anyos ang suspect na puwersahang pinasok ang tahanan ng kanilang kapitbahay.
Agad namang ipinabatid ng ama ni Zabat sa anak na parak ang nakasaksi at kahit naka-off-duty ay mabilis na nagresponde.
Inabutan umano ni Zabat ang suspect habang papatakas bitbit ang dalawang cellphone na ninakaw nito sa kanilang kapitbahay. Nang komprontahin ni Zabat ang nasabing suspect ay tinangka nitong bumunot ng baril pero naunahan ito ng nasabing pulis na agad pinaputukan sa tiyan ang suspect .
Ang suspect ay agad na bumulagta at dead-on-the-spot sa nasabing insidente. Kasalukuyan na ring inaalam ng mga awtoridad kung saang grupo ng mga kriminal konektado ang suspect.
Inihayag naman ni PRO 3 Director P/Brig. Gen. Fajardo ang commitment ng kapulisan sa kaniyang hurisdiksyon para sa kaligtasan ng kanilang mga mamamayan.
- Latest
