Babaeng negosyante binaril sa ulo sa tindahan, patay

MANILA, Philippines — Sabog ang bibig ng isang 63-anyos na matandang babaeng negosyante matapos paputukan ng baril ng hindi pa nakilalang salarin sa loob ng kaniyang tindahan sa Brgy. Nancapian, Malasigue, Pangasinan kamakalawa.

Dead-on-the-spot ang biktima na itinago sa pangalang Nenita, residente ng nasabing lugar, dahil sa tinamong isang tama ng bala sa bibig na naglagos sa ibabang bahagi ng kaniyang ulo.

Sa inisyal na ulat ng Pangasinan Police, kasalukuyang abala ang matanda kasama ang pamangkin nitong babae sa kanilang tindahan nang biglang dumating ang suspect na armado ng cal.45 pistol.

Ang salarin ay nagpanggap na kustomer na may bibili ng meryenda na sumungaw pa sa maliit na bintana ng tindahan.

Sa puntong ito ay dito na pinaputukan ng suspect ang biktima sa kaniyang bibig saka mabilis na tumakas patungo sa hindi pa malamang destinasyon.