Rider niratrat sa tapat ng bahay, todas!

MANILA, Philippines — Patay ang isang rider nang paulanan ng bala ng ‘di kilalang salarin habang ipinaparada ang kanyang motorsiklo sa tapat ng kanilang tahanan sa Taytay, Rizal kamakalawa ng gabi.

Dead-on-arrival na sa Taytay Emergency Hospital ang biktimang si John Paul Permacio, nasa hustong gulang at residente ng Sitio Lumang Ilog, Brgy. San Juan, sa Taytay bunsod ng mga tama ng bala sa iba’t ibang bahagi ng katawan.

Sa ulat ng Taytay Municipal Police, dakong alas-10:30 ng gabi nang maganap ang krimen sa tapat mismo ng bahay ng biktima.

Kauuwi lang umano ng biktima ng bahay at ipinaparada ang kanyang motorsiklo nang bigla na lang sumulpot ang suspek at kaagad siyang pinagbabaril sa iba’t ibang bahagi ng katawan.

Nang matiyak na napuruhan ang target, mabilis na tumakas ang salarin, bitbit ang baril na ginamit sa krimen, habang isinugod sa pagamutan ang biktima ngunit hindi na umabot pang buhay.