POGO hub nadiskubre sa Laguna: 3 Chinese timbog, 23 Pinoy nasagip!

CAVITE, Philippines — Sinalakay ng pulisya ang ilegal na POGO hub sa lungsod ng Calamba, lalawigan ng Laguna na ikinaaresto ng tatlong Chinese national habang 23 na empleyado ang nasagip, kamakalawa.

Sa order mission ng Bureau of Immigration (BI) at report na galing sa OLEA, nagkasa ng joint operation ang mga Criminal Investigation and Detection Group (CIDG) RFU-4A sa pinamunuan ni P/Col Geovany Emerick Sibalo; Laguna PPO, Regional Intelligence Unit, RID4A, Calamba Police, Bureau of Immigration, Presidential Anti Organized Crime Commission (PAOCC) Cybercrime Unit at Department of Justice dakong alas-9 ng umaga sa Sitio Ilaya, Brgy. Lamesa, Calamba City kung saan nagsagawa sila ng inspection at operation hinggil sa diumano’y ilegal na POGO operations sa nasabing lugar. 

Ipinatupad rin ng BI ang Mission Order 2025-027 laban sa isang Chinese national na si Lou Wenguang .

Sa nasabing pagsalakay, positibong kasama sa POGO ang target ng BI at kasama pa ang dalawang Chinese national na sina alyas “Weng”, 34-anyos at alyas “Yuan”, 32-anyos, na dinakip .

Na-rescue naman sa operasyon ang 23 na Pilipinong nagtatrabaho sa kompanya na may pangalang Beauty Technologies Corp.

Sa isinagawang beripikasyon ng BPLO ng Calamba City, walang kaukulang Business Permit o mga legal na dokumento para mag-operate ang Beauty Technologies Corp.