‘Akyat-bahay’ bulagta sa guwardya
PILI, Camarines Sur, Philippines — Bulagta ang isang 18-anyos na hinihinalang kasapi ng “akyat-bahay gang” matapos barilin ng guwardya nang maaktuhang nagnanakaw kasama ang dalawa pa sa Ray Sto. Domingo Junk Shop sa Zone-5, Brgy.Tagbong, Pili, Camarines Sur kamakalawa ng madaling araw.
Napuruhan ng punglo sa katawan at agad nasawi ang suspek na kinilalang si Jerry Balbuena Erato, residente ng Zone-5 Balatas, Brgy. Anayan ng naturang bayan. Hindi naman nakilala ang dalawa pang suspek na mabilis nakatakas.
Sa ulat, dakong alas-3:45 ng madaling araw habang nagroronda ang security guard na si Daniel Villaluna Larcina, 29-anyos, ng Brgy. Manapao, Minalabac nang maaktuhang nagnanakaw ang tatlong suspek sa loob ng compound ng junk shop.
Bumunot umano ng baril si Erato at itinutok sa guwardya dahilan para paputukan ito ng dalang shotgun.
Duguang bumulagta ang suspek habang sa takot ay mabilis na kumaripas patakas ang dalawa nitong kasamahan.
Narekober ng mga rumespondeng pulis sa tabi ng napaslang na suspek ang isang improvised na kalibre 45 revolver.
- Latest