Driver pumalag sa isnatser, patay!
CAVITE, Philippines — Patay ang 32-anyos na mister makaraang pagbabarilin nang manlaban sa isang snatcher na nang-agaw ng bag nito kamakalawa ng gabi sa Brgy. Bagtas, Tanza, dito.
Kinilala ang biktima na si Erwin Lomoloy, 32 anyos, part time driver at residente ng Blk 33 Lot 12 Sec 20, Ph2, Carissa, Brgy. Bagtas, Tanza, Cavite.
Sa imbestigasyon nina Police Master Sergeant Israel Villela at Police Corporal Nikko Paul Barranco, alas-8:30 ng gabi nang maganap ang insidente habang sakay ang biktima ng kaniyang puting Honda Genio at bumabagtas sa Brgy. Bagtas.
Dinikitan umano ang biktima ng suspek na nakilalang si Jeffrey Mojica Gerpacio, 30-anyos, residente ng Blk 3, L20, Sec 20, Ph 2, Pabahay 2000, Brgy. Bagtas, Tanza, Cavite, na sakay rin ng itim na motorsiklo.
Nang matapatan, pilit na inagaw umano ng suspek ang bag ng biktima subalit nanlaban ang huli kaya siya pinagbabaril ng salarin.
Duguang bumulagta ang biktima na naitakbo pa sa MV Santiago Hospital subalit hindi na naisalba pa ng mga doktor.
- Latest
