2 parak dedo sa road mishap
IROSIN, Sorsogon, Philippines — Dalawang pulis ang nasawi matapos ang magkahiwalay na aksidente sa daan sa Irosin, Sorsogon at lalawigan ng Cavite, ayon sa pulisya kahapon.
Sa unang report, nasawi si Patrolman Jan Julius Añonuevo Avillano, 26-anyos, binata, residente ng Brgy. Sto. Domingo, Irosin, Sorsogon at nakatalaga sa 2nd Police Provincial Mobile Force Company matapos bumangga sa outpost ng guwardya ang minamanehong motorsiklo nito sa kahabaan ng Maharlika National Highway sa Purok-1, Brgy. Buenavista sa Irosin, Sorsogon kamakalawa ng madaling araw.
Sinubukan pang isugod ng mga rumespondeng rescue team ng bayan sa pagamutan pero hindi na umabot nang buhay ang nasabing pulis.
Samantala, patay rin si Police Corporal Randy Atilano Ramos, nakatalaga sa Presidential Security Group (PSG) sa Malacañang makaraang sumalpok sa puno sa gilid ng kalsada kahapon ng madaling araw sa kahabaan ng Alilio Drive, Brgy. Upli, Alfonso, Cavite.
Sa imbestigasyon ni P/Master Sergeant Elmer Mendoza, ala-1:12 ng madaling araw kahapon habang sakay ang biktima ng kaniyang CF Moto NK400 na may plate #718UBA at may kabilisan ang takbo nang mawalan ng kontrol sa manibela hanggang sa tuluy-tuloy na sumalpok sa malaking puno na nasa gilid ng highway.
Agad na naitakbo sa Tagaytay Medical Center si Cpl. Ramos subalit idineklara itong dead-on-arrival dahil sa matinding pinsala sa ulo nito. - Cristina Timbang, Joy Cantos
- Latest