2 convenience store, hinoldap ng nagpanggap na customers  

MANILA, Philippines — Dalawang convenience store ang magkasunod hinoldap ng mga armadong kalalakihan na nagpanggap na mga customer sa lalawigan ng Cavite at Laguna nitong Sabado ng madaling araw.

Sa ulat ng CALABARZON Police, bandang alas-3:20 ng madaling araw nang looban ng anim na armadong kalalakihan ang 7/11 Convenience Store sa Brgy. Lucsuhin, Silang, Cavite.

Ayon sa imbestigasyon,  ang mga suspect ay nagpanggap na kustomer na kumuha ng mga tsokolate, sigarilyo at cash na umaabot sa humigit kumulang sa P50,000.

Wala na umanong nagawa ang mga crew matapos silang tutukan ng baril ng mga suspect at mabilis na tumakas lulan ng kulay puting SUV na Toyota Fortuner patungo sa direksyon ng Tagaytay.

Bago ito, dakong ala-1:30 ng madaling araw ay hinoldap din ng nag-iisang armadong suspect ang Alfamart convenience store sa Brgy. Masiit , Calauan, Laguna na binabantayan ng nag-iisang kahera na si Michelle Santos.

Ang suspect na nagpanggap ding kustomer ay kumuha pa ng ilang sachet ng kape at paglapit sa kahera ay saka nagdeklara ng holdap kung saan puwersahang tinangay ang P10,000 cash na mabilis na tumakas lulan ng motorsiklo patungo sa direksiyon ng Bay, Laguna.