Lalaki natagpuang patay sa damuhan
MANILA, Philippines — Isang lalaki na hinihinalang Chinese ang natagpuang patay sa madamong bahagi ng Saddle and Leisure Park ng Sta. Lucia Realty Development sa Brgy. Tres Cruses, Tanza City, Cavite kamakalawa ng gabi.
Sa ulat ng Tanza Police, alas-7:00 ng gabi nang matagpuan ng ilang estudyante ang nakabalot na biktima.
Inilarawan ng pulisya ang biktima na isang mestiso at tanging pantalon lamang na nakababa ang suot nito, tinatayang nasa edad na 30 hanggang 40, may taas na 5’5” hanggang 5’6”, nakabalot ng duct tape ang buong ulo nito at nakabalot pa ito sa isang brown na kumot na may mga sugat sa kamay at leeg.
Ayon kay Police Chief Inspector Dennis Villanueva, hepe ng Tanza Police, may hinala umano sila na ang biktima ay ang Chinese national na una nang naiulat na kinidnap na tumugma sa deskripsyon sa larawan na hawak ng Anti-Kidnapping Unit.
Bago ang insidente ng pagkakatagpo sa bangkay ng biktima, may naunang report na natanggap ang pulisya hinggil sa isang bahay sa Pacifica Homes, Brgy. Navarro, Gen.Trias na umalingasaw umano ang malansang amoy.
Sa pagresponde ng pulisya ay nakita sa loob ng banyo ng nasabing bahay ang nagkalat na dugo at sa kuwarto ng bahay ay nakuha ang 2 granada.
Hinala ng pulisya na may kaugnayan ito sa pagkakatagpo sa bangkay ng biktima na doon muna unang itinago bago pinatay at itinapon sa nasabing lugar.
- Latest
