3 NPA todas sa engkuwentro sa Negros
MANILA, Philippines — Tatlong miyembro ng New People’s Army (NPA) ang patay sa magkasunod na sagupaan sa pagitan ng tropa ng pamahalaan habang nasa 800 residente naman ang inilikas sa Kabankalan City, Negros Occidental.
Sa report ng Philippine Army, unang sumiklab ang engkuwentro noong Sabado bandang alas-5 ng gabi sa Brgy. Oringao, Kabankalan City makaraang rumesponde ang mga pulis at kasapi ng 94th Infantry Battalion (IB) sa report na may presensya ng mga armadong kalalakihan ay nagsasagawa ng pangingikil.
Agad na kumilos ang mga awtoridad at nang marating ang bulubunduking bahagi ng nasabing lugar, dito na sinalubong ng putok ng mga rebelde ang mga tropa ng pamahalaan na nauwi sa 20-minutong bakbakan.
Linggo ng umaga nang muling magsagawa ng pursuit operations ang tropa ng pamahalaan laban sa mga rebeldeng grupo na nagresulta sa muling pagsiklab ng sagupaan.
Tumagal ng ilang minuto ang putukan na ikinamatay ng tatlong rebelde habang wala namang naiulat na nasawi o nasugatan sa mga pulis at sundalo.
Narekober ng mga awtoridad sa lugar ang M14 Rifle, .45 caliber pistol,.38 caliber, magazine at bala, backpacks, ibang personal na kagamitan at mga subersibong dokumento.
Ayon naman kay Kabankalan City Mayor Benjie Miranda, nasa 283 pamilya o 822 katao ang inilikas dahil sa bakbakan at pansamantalang nakasilong sa covered court ng barangay.
- Latest