P69 milyong shabu nasabat sa checkpoint
MANILA, Philippines — Nasa P69 milyong halaga ng hinihinalang shabu ang nasabat ng mga tauhan ng Philippine Coast Guard (PCG) at lokal na pulisya nang kanilang harangin ang isang lalaking lulan ng kotse nitong Martes sa isang checkpoint sa Allen, Northern Samar.
Kinilala ang naaresto na si Mangayao Lapn Mitomara, residente ng Paliparan, Dasmariñas City, Cavite.
Sa ulat, tumulong ang Coast Guard District Eastern Visayas at Coast Guard K9 Force sa Allen Municipal Police sa ikinasang joint land interdiction operation sa Brgy. Jubasan, Allen, ng naturang lalawigan.
Nagsasagawa ng checkpoint ang mga pulis at coast guard nang kanilang sitahin ang silver Toyota Vios dahil sa hindi pagsusuot ng seatbelt ng driver nito at wala ring maipakitang rehistro ng sasakyan.
Dahil sa “impoundable penalty” ito, inimbitahan ang suspek sa tanggapan ng Highway Patrol Group-Northern Samar Office para sa beripikasyon.
Nang inspeksyunin ang sasakayn, dito tumambad ang isang eco bag na naglalaman ng 10 bloke ng hinihinalang shabu. Nakabalot ang iligal na droga sa Chinese tea bag wrapper na may label na “Guanyinyang” bilang isa sa paraan para makaiwas sa paghihinala ng mga awtoridad.
- Latest