Mag-utol namutol ng puno, patay sa kuryente
GOA, Camarines Sur, Philippines — Kapwa nasawi ang magkapatid na batang lalaki matapos makuryente habang pinuputol ang isang puno ng saging sa Brgy. Panday, Goa, Camarines Sur kamakalawa ng hapon.
Sinubukan pang isugod ng mga residente sa Goa Municipal Infirmary pero parehong hindi na umabot nang buhay ang mga biktima na kinilalang sina Christopher Ligotan Mojado, 15-anyos at Greg Ligotan Mojado Jr., 12-anyos, kapwa residente ng naturang lugar.
Sa ulat, ala-1 ng hapon, sinubukan ng magkapatid na putulin ang puno ng saging sa likurang bahagi ng bahay ng nagngangalang Shannie Taduran.
Gayunman, nang maputol ay bumagsak ito sa kable ng kuryente dahilan para biglang nangisay ang mga biktima.
Mabilis naman silang sinaklolohan ng mga residente at isinugod sa pagamutan pero ideneklarang dead-on-arrival.
- Latest