LGBT member hinoldap, mukha nilaslas 2 bagets na suspek arestado
CAVITE, Philippines — Tinangayan ng cellphone at nilaslas pa ang mukha ng isang 22-anyos na miyembro ng LGBT community ng tatlong lalaki kabilang ang dalawang menor-de-edad habang pauwi kahapon ng madaling araw sa Barangay Santiago, Gen. Trias City.
Kasalukuyang nilalapatan ng lunas sa pagamutan ang biktima na nakilalang si Edison Buscay, residente ng B18 L3 LRTA, Brgy. Santiago, Gen. Trias City.
Dalawa sa tatlong suspek ang agad naaresto ng mga taga-barangay Santiago na nakilalang sina alias “Dante”, 17- anyos at alias “Tyrone”, 15-anyos; kapwa residente ng Pabahay, Brgy. San Francisco, Gen Trias City, Cavite.
Nakatakas naman ang isa pa sa mga suspek na nakilala lamang sa alias “Toto”, nasa hustong gulang at residente rin sa naturang lugar.
Sa imbestigasyon ng pulisya, alas-3 ng madaling araw habang naglalakad ang biktima sa loob ng LRTA Subdivision at nagse-cellphone at papauwi na sana ng bahay nang harangin ng mga suspek na sakay ng isang motorsiklo.
Bumaba ang dalawa sa tatlong suspek at tinutukan ang biktima at nagdeklara ng hold-up.
Agad na hinablot ng mga suspek ang cellphone ng biktima at bago sumakay ng motorsiklo ay walang kaabug-abog na nilaslas ng isa sa mga suspek ang mukha ng biktima.
Kahit na duguan, nagtatakbo ang biktima at humingi ng tulong sa barangay.
Agad namang naitakbo ang biktima sa pagamutan habang naaresto ng security guard ng nasabing subdivision ang papatakas na dalawang suspek.
Narekober sa dalawang suspek ang cellphone ng biktima habang tinutugis pa ng mga awtoridad ang isang kasamahan.
- Latest