164 NPA rebels sumuko sa MIMAROPA
MANILA, Philippines — Umaabot na sa 164 miyembro at ilang opisyal ng Communist Party of the Philippines–New People’s Army (CPP-NPA) ang sumuko sa pulisya sa magkakahiwalay na insidente sa MIMAROPA (Mindoro, Marinduque, Romblon at Palawan), ayon sa opisyal kahapon.
Ayon kay Police Regional Office (PRO) 4B (MIMAROPA) chief P/Brig. Gen. Sidney Hernia, ang nasabing mga rebelde ay sumurender sa iba’t ibang units ng pulisya sa kanilang rehiyon mula Enero hanggang Nobyembre ng taong ito.
Sinabi ni Hernia na ang pagsuko ng nasabing bilang ng CPP-NPA ay bunga ng pinalakas na counter-insurgency campaign upang mapalaya ang MIMAROPA partikular na ang mga kanayunan sa impluwensiya ng komunistang grupo.
Pinakahuli naman sa mga nagsisuko ay ang dalawang miyembro ng NPA sa lalawigan ng Oriental Mindoro kamakalawa. Ang mga ito ay kinilala sa mga alyas na Ka Gringo, 27, ng Bulalacao,Oriental Mindoro at Ka Jimbo, 33-anyos. Sila ay pawang miyembro ng Platoon Serna ng Kilusang Larangang Gerilya-Mark Anthony Velasco sa ilalim ng Lucio de Guzman Command, Sub-Regional Military Area-4D), Southern Tagalog Regional Party Committee.
Sinabi ni Hernia na sumuko ang mga rebelde matapos ang masusing dayalogo ng tropa ng militar at pulisya sa Brgy. Cabalwa, Mansalay, Oriental Mindoro.
Isinailalim na sa kustodya ng mga awtoridad ang mga nagsisukong rebelde kaugnay ng tactical interrogation sa mga ito.
“All those who surrendered can avail of the E-CLIP for their reintegration to the community and will be receiving livelihood program and cash aid from the government,” pahayag ni Hernia.
- Latest