Kotse hulog sa irigasyon: 3 patay!

MANILA, Philippines — Namatay sa pagkalunod ang tatlo katao nang sumadsad hanggang sa mahulog ang kanilang kotse sa irrigation canal sa Purok 5, Barangay Ambatali, Ramon, Isabela nitong Miyerkules.

Kinilala ni Col. Julio Go ang mga biktima na sina Ruel Galut, Junior Budilla, 36, at Zyra Janine Galut, 13, pawang mga residente ng Pinto, Alfonso Lista, Ifugao.

Ayon sa pulisya, mabilis ang takbo ng sasakyan hanggang sa magpagewang-gewang sa madulas at pakurbadang kalsada.

Nagtuluy-tuloy sa kanal ang sasakyan at hindi na nakaligtas ang mga biktima matapos silang ma-trap sa loob ng sasakyan.

Naiahon lamang ang mga biktima nitong Huwebes nang tumulong ang rescue personnel ng lalawigan.