4 Vietnamese nasabat sa karagatan ng Palawan
MANILA, Philippines — Apat na Vietnamese nationals ang nasa kustodya ngayon ng Philippine Coast Guard (PCG)-District Palawan makaraan silang masabat habang illegal na nangingisda sa karagatang sakop ng Pag-asa Island sa Kalayaan, Palawan kamakailan.
Sa ulat, inaresto ng pinagsanib na puwersa ng PCG-Kalayaan Station, Philippine Navy (PN) at Philippine National Police-Maritime Group (PNP-MG) ang apat na Vietnamese dahil sa iligal na pangingisda gamit ang ipinagbabawal na “sodium cyanide” noong Setyembre 18.
Kinumpiska rin ng joint maritime law enforcement team ang fishing vessel na gamit ng mga Vietnamese na tinatawag na “sampan”.
Nananatiling nasa kustodiya ng PCG-District Palawan ang mga mangingisdang dayuhan na nakatakdang isailalim sa imbestigasyon at determinahin ang tamang disposisyon sa kanila.
Kakasuhan ng paglabag sa Sections 91 at 92 ng Republic Act No. 10654 o ang “Philippine Fisheries Code of 1998” ang naturang mga dayuhan.
- Latest