Chinese POGO workers sa Cavite, nag-aplay ng police clearance
MANILA, Philippines — Alinsunod sa kasunduan ng Philippine National Police (PNP) at direktiba ni PNP Chief Gen Rodolfo Azurin Jr., nagsimula nang kumuha ng police clearance ang mga Chinese na empleyado ng Philippine Offshore Gaming Operators (POGOs) sa Carmona,Cavite.
Ang Sky Dragon Global Technologies Corp, isang Cavite-based business process outsourcing service provider at lisensyado ng PAGCOR ay isa sa mga unang tumugon sa panawagan ng PNP.
Ayon kay Ryan Sy, general manager ng Sky Dragon, nakipagkasundo sila sa PNP na iproseso ang police clearance ng kanilang mga empleyado bilang isa sa mga requirements na makapagtrabaho sila sa bansa.
Halos dalawang buwan nang nag-o-operate ang Skydragon na may 400 empleyado kung saan 95 percent dito ay mga Filipino.
Ang police clearance ay isa sa mga napagkasunduang requirement para sa operasyon ng POGO dahil sa pagtaas ng krimen sa bansa partikular ang kidnapping kung saan sangkot ang ilang empleyado ng POGO.
Idinagdag ni Sy na nais din siguraduhin ng pulisya na walang mga kaso at hindi wanted sa batas ang mga empleyadong nagmula sa ibang bansa.
Base sa record ng pulisya, tumaas ang kaso ng kidnapping simula noong 2017 at karamihan sa nagiging suspek ay empleyado ng POGO.
- Latest