Parak itinumba ng riding-in-tandem
SAN JUAN, Batangas, Philippines — Patay ang isang 52-anyos na police official matapos tambangan at barilin ng riding-in-tandem sa bayan ng San Juan, kamakalawa ng hapon.
Kinilala ng San Juan police ang biktimang si Police Executive Master Sergeant Romel Panopio, residente ng Barangay Tipaz, San Juan, Batangas at PNP personnel na nakadestino sa Batangas Police Provincial Office(BPPO).
Ayon sa report, alas-3:40 ng hapon ay sakay si Panopio sa kanyang van at papasok na sa kanyang trabaho nang pagbabarilin ng mga suspek pagsapit sa Barangay Calicanto ng nasabing bayan.
Nang masigurado ng mga suspek na napatay nila ang biktima ay mabilis na tumakas ang mga ito.
Nadala pa sa pagamutan si Panopio, subalit idineklarang dead on arrival dahil sa mga tama ng bala sa katawan.
Inaalam pa ng pulisya ang motibo ng pamamaslang at ang responsable sa krimen. - Ed Amoroso at Doris Franche
- Latest
