SUV bumaliktad: dalaga utas
LEGAZPI CITY, Albay, Philippines — Hindi na umabot ng buhay sa ospital ang isang 18-anyos na dalaga matapos ang sinasakyan nitong SUV ay bumangga at bumaliktad kamakalawa sa kahabaan ng Washington Drive, Brgy. 16 ng lungsod na ito.
Ang nasawi ay kinilalang si Sophia Manzanades habang sugatan naman ang mga kasama sa sasakyan na sina Paolo Justin Datar Lita; at Mark Pacardo na inaalam pa ang mga tirahan.
Sa ulat, ala-1:30 ng madaling araw ay mabilis na binabagtas ng Toyota Fortuner (EAE-9953) ang kahabaan ng highway nang mawalan ito ng kontrol at bumangga sa gutter at kongkretong garden box saka bumaliktad sa gitna ng kalsada.
Maging ang isang nakaparadang motorsiklo sa tabi ng kalsada ay nahati at nawasak makaraang salpukin ng SUV.
Mabilis na binunot sa loob ng wasak at nakabaliktad na sasakyan at isinugod sa UST Hospital si Manzanades pero hindi na umabot nang buhay habang kritikal na isinugod sa Daraga Doctor’s Hospital sina Lita at Pacardo.
Inaalam pa ng pulisya kung sino sa dalawang nasugatan ang nagmamaneho ng SUV.
- Latest