2 crew ng sumadsad na barko, nasagip
MANILA, Philippines — Nasa ligtas nang kalagayan ang kapitan at isang crew ng cargo vessel na sumadsad makaraang masagip sila ng mga tauhan ng Philippine Coast Guard (PCG) sa karagatang sakop ng Masinloc, Zambales noong Linggo ng hapon.
“For info, na-rescue na po ang boat captain at chief mate as of 05:45 p.m.,” ayon sa PCG.
Kinilala ng PCG ang nasagip na kapitan na si Allan Boyboy habang ang kaniyang chief mate ay si Felix Gepillano Jr.
Sumadsad ang LCT Aviva 80 sa karagatang sakop ng Barangay Bani sa Masinloc dahil sa malalakas na hangin at matataas na alon. Nanatili sa barko sina Boyboy at Gepillano nang sumadsad ito.
Inisyal na naiulat na 22 sa 24 na crew ng barko ang unang nailigtas at naisugod sa Rural Health Unit sa bayan ng Masinloc.
Sa paunang pagsusuri ng PCG Marine Environmental Protection Group sa Zambales, wala silang nakitang bakas na nagkaroon ng oil spill sa bahagi ng dagat kung saan nakasadsad ang barko.
- Latest