Mister na-depress sa sakit na cancer, nag-suicide

TIAONG, Quezon, Philippines — Winakasan ng isang mister ang kanyang buhay sa pamamagitan ng pagbibigti makaraang hindi na matagalan ang depresyon bunsod ng dinaranas na matinding sakit at kakulangan ng pera sa Sitio Adelina, Barangay Lagalag ng bayang ito, kamakalawa ng umaga.

Kinilala ng pulisya ang biktima na si Arturo Gile, 52, residente sa naturang lugar.

Batay sa imbestigasyon, bandang alas-7:30 ng umaga ay natuklasan ni Jovelyn ang kanyang ama na nakabigti sa loob ng kuwarto nito sa pamamagitan ng paggamit ng cable wire.

Tulung-tulong na inalis mula sa pagkakabitin ang biktima at mabilis na dinala sa ospital subalit idineklarang dead-on-arrival.

Ayon kay Jovelyn, may ilang buwan nang nakakaranas ng depresyon ang kanyang ama dahil sa cancer sa buto at pinoproblema nito ang pagpapa-ospital at pang-araw-araw na pambili ng gamot.