Coastal waters sa 6 na lugar, may ‘red tide’
MANILA, Philippines — Ipinagbabawal ng Bureau of Fisheries and Aquatic Resources (BFAR) na hanguin, ibenta at kainin ang shellfish products tulad ng tahong, talaba at halaan mula sa anim na karagatan sa bansa dahil sa kontaminasyon ng red tide.
Ayon sa BFAR hindi dapat makarating sa mga pamilihan ang mga shellfish products mula sa coastal waters ng Bolinao sa Pangasinan; Milagros sa Masbate; Dauis at Tagbilaran City sa Bohol; Dumanquillas Bay sa Zamboanga del Sur; Litalit Bay, San Benito sa Surigao del Norte; at Lianga Bay sa Surigao del Sur dahil sa mataas na toxicity level ng lason ng red tide sa naturang mga baybayin.
Hinikayat din ng BFAR ang mga Local chief executives sa nabanggit na mga lugar na huwag hayaan na maibenta sa mga palengke ang shellfish products dahil kapag kinain ay maaari itong makaapekto sa kalusugan ng mga tao tulad ng pagtatae, pagsakit ng tiyan, dehydration na posibleng magdulot ng kamatayan.
Gayunman, maaari namang makain mula sa mga baybayin ang isda, pusit, hipon, at alimango basta’t kailangang hugasan lamang, tanggalin ang hasang at kaliskis at lutuing mabuti bago kainin.
- Latest
