Dayo na ‘tulak’ utas sa buy-bust

TALAVERA, Nueva Ecija, Philippines — Nasawi ang isang dayong lalaki na tulak umano ng ilegal na droga makaraang kumasa sa isinagawang buy-bust operation ng pulisya sa Brgy. San Ricardo ng bayang ito kahapon ng madaling-araw.

Kinilala ni P/Lt. Col. Heryl Bruno, hepe ng pulisya rito, ang napatay na suspek na si June Arimbuyutan alyas “Oroy”, 42-anyos ng Brgy. MS Garcia, Cabanatuan City, na kabilang umano sa drugs watchlist bilang pusher/user.

Sa ulat, ala-1:30 ng madaling-araw, isinagawa ang buy-bust ng pinagsanib na puwersa ng Drug Enforcement Unit ng Talavera Police, Police Provincial DEU at Police Intelligence Unit ng Nueva Ecija sa nasabing barangay. Matapos mabilhan ang suspek ng police poseur buyer ng 2-plastic sachet ng umano’y shabu ay naghinala na pulis ang kanyang ka-deal hanggang sa bumunot ng baril at ipinutok sa buyer pero sumablay. Gumanti ng putok ang nakaposteng pulis kaya’t napatay ang suspek.

Nakuha sa lugar ang 2-plastic sachet ng hinihinalang shabu na may timbang na 10-gramo at nagkakahalaga ng P68,000; isang caliber .38 revolver na walang serial number; at isang kulay pula na Honda motorized tricycle na gamit ng suspek sa ilegal na transaksyon.