Top 5 ‘most wanted’ ng PNP natimbog sa Nueva Vizcaya

BAYOMBONG, Nueva Vizcaya, Philippines — Matapos ang mahigit sa 9 na taon na pagtatago, nadakip na ng mga awtoridad ang tinaguriang No. 5 most wanted person sa national level ng PNP-Highway Patrol Group (PNP-HPG) matapos mamataan sa Barangay Roxas, Solano ng lalawigang ito kamakalawa.

Kinilala ni P/Capt. Jet Sayno, hepe ng Solano Police ang nahuling suspek na si Job Lapitan, 72, dating pulis at residente ng Purok 1, Barangay Bangar sa nabanggit na bayan.

Ayon kay Sayno, ang akusado ay nadakip ng pinagsanib na puwersa ng Nueva Vizcaya HPG, Nueva Vizcaya Police Provincial Office (NVPPO) at mga operatiba ng Solano Police dakong alas-3:30 ng hapon.

Si Lapitan na nag-AWOL noong taong 2000 ang itinuturong tumangay sa isang Starex na pag-aari ng isang kilalang abogado at politiko sa nasabing bayan noong Hunyo 2012, kasama ang tatlong iba pang kalalakihan.

Bukod sa kasong carnapping, isinilbi rin kay Lapitan ang dalawa pang warrant of arrest sa kasong illegal possession of fire arms and explosives, at slight physical injury.

Napag-alaman na kasalukuyan noon na barangay chairman sa kanilang lugar si Lapitan nang siya ay makasuhan ng anti-carnapping act.