P21 milyong marijuana winasak sa Kalinga
Nadiskubre sa 11 plantasyon
TUGUEGARAO CITY, Cagayan, Philippines — Muling nakapuntos ang mga awtoridad matapos nilang madiskubre ang nasa P21.9 milyon na halaga ng marijuana sa 11 plantasyon saka sinunog ang mga ito sa Tinglayan, Kalinga, ayon sa ulat ng awtoridad kahapon.
Ang mga plantasyon ng marijuana ay nadiskubre umano ng pinagsanib na pwersa ng Kalinga Provincial Police Office, Regional Intelligence Unit at Philippine Drug Enforcement Agency (PDEA) sa tatlong araw nilang tuluy-tuloy na operasyon nitong Hunyo 15-17.
Unang winasak ng mga awtoridad ang nasa 57,500 fully grown na malalaking puno ng marijuana at 65,000 na seedlings nito, na tinatayang nagkakahalaga ng P14,100,000.00, sa Barangay Butbut Proper.
Nasa 34,000 fully grown marijuana o tinatayang P6,800,000.00 naman ang sinira ng mga awtoridad sa Barangay Loccong sa nasabi ring bayan habang umabot sa 5,000 fully grown marijuana na nasa P1 milyon ang sinira sa Barangay Buscalan.
- Latest