Rizal ambush: 2 patay sa tandem
MANILA, Philippines — Patay ang dalawang obrero nang tambangan at pagbabarilin ng dalawang ‘di kilalang lalaki habang magkaangkas sa isang motorsiklo sa Morong, Rizal kamakalawa ng umaga.
Ang mga biktima ay nakilalang sina Robert Cortez, 44, tubong Masbate at Eric Adamero, 43, tubong Samar at kapwa residente ng George Town Subdivision, Sitio Balante, Brgy. San Jose, Morong, Rizal.
Sina Cortez at Adamero ay agad binawian ng buhay dahil sa mga tama ng bala ng ‘di pa batid na kalibre ng baril, sa iba’t ibang bahagi ng kanilang katawan habang mabilis na tumakas ang mga salarin matapos ang krimen.
Batay sa paunang report ng Morong Municipal Police, alas-7:30 ng umaga, magkaangkas ang mga biktima sa isang motorsiklo patungo sanang town proper ng Morong nang pagsapit inyersection ng Garrovillas St., Brgy. San Jose ay bigla na lang silang tinambangan at pinaulanan ng bala ng mga salarin.
Nang matiyak na napuruhanan ang mga biktima, mabilis na tumakas ang mga salarin patungo sa direksiyon ng Brgy. San Juan.
- Latest
