2 sasakyan inararo ng SUV: Driver dedo, 3 pa sugatan
TIAONG, Quezon, Philippines — Patay ang isang tricycle driver habang nasugatan ang tatlong iba pang katao matapos na araruhin ng isang SUV ang dalawang tricycle at kariton sa Maharlika Highway na sakop ng Barangay Lalig sa bayang ito, kamakalawa ng umaga.
Base sa ulat ni P/Lt. Col. Dennis Del Leon, kinilala ang nasawing biktima na si Reynante Morillo, 41, ng Barangay Lumingon, Tianong.
Ginagamot naman sa United Candelaria Hospital dahil sa tinamong mga sugat sa iba’t ibang parte ng katawan sina Joel Reformado, 43; asawang si Vanessa, 41 at ang nagtitimon sa kariton ng kalabaw na si Ariel San Diego ng Barangay Bungoy, Dolores, Quezon.
Ayon sa ulat, bandang alas-9:50 ng umaga habang minamaneho ni Roderick
Corre, 34, ng Candelaria, Quezon ang isang Nissan Navarra nang pumutok ang kaliwang unahan ng gulong nito kung kaya’t nawalan ng direksyon ang pagtakbo at inararo ang mga kasalubong na tricycle nina Morillo at Reformado, at ang kariton na nasa gilid lamang ng kalsada.
Mabilis na isinugod sa ospital ang mga biktima subalit nalagutan ng hininga kinalaunan si Morillo.
Sinampahan ng kasong “reckless imprudence resulting in homicide and physical injuries and damages to properties” ang tsuper ng SUV.
- Latest