Trader patay sa ambush sa subdibisyon

CAVITE MANILA, Philippines — Patay ang isang negosyante nang tambangan at pagbabarilin sa sa loob ng isang subdivision kahapon ng umaga sa Brgy. Osorio Trece Martires City.

Kinilala ng pulisya ang biktima na si Leo Extinado, 53-anyos at residente ng Brgy. Osorio, Trece Martires City, Cavite.

Hindi naman nakilala ang suspek na mabilis na tumakas matapos ang ginawang pagpatay sa biktima.

Sa ulat mula sa tanggapan ni Cavite Provincial Director Police Col Marlon Santos, alas-7:15 ng umaga nang maganap ang pamamaril.

Habang naglalakad ang biktima sa Summerfield Subdivision nang biglang barilin sa ulo ng ‘di nakilalang salarin na nakaabang sa daan.

Duguang bumulagta ang biktima habang mabilis na tumakas ang suspek bitbit ang baril na ginamit sa pagpatay.

Isang hot pursuit ­operation na ang isinasagawa ng pulisya habang wala pa ring malinaw na motibo sa naganap na pana­nambang.