7-anyos na bata, nilamon ng ilog
SAN MARIANO, Isabela , Philippines — Hindi na naisalba pa ang buhay ng isang 7-anyos na batang lalaki matapos malunod habang nagtatampisaw sa isang ilog sa Barangay Zone 2 sa bayan na ito kamakalawa.
Kinilala ng San Mariano PNP ang nasawing biktima na si Carl Michael Acoba, residente ng Barangay Zone 1 sa nabanggit na bayan.
Batay sa imbestigasyon ng pulisya, lingid sa kaalaman ng mga magulang ng biktima ay sumama pala ito sa ibang mga bata at nagtungo sa Pinacanauan River para maligo.
Habang nagtatampisaw umano ang mga ito ay aksidenteng tinangay ng malakas na agos sa malalim na bahagi ng ilog dahilan para malunod.
Isinugod pa umano sa pinakamalapit na pagamutan ng mga rumespondeng residente ang bata subalit idineklara ito dead-on- arrival.
Nanawagan naman ang pulisya sa mga residente na bantayan mabuti ang kanilang mga anak lalo na ngayong mainit ang panahon kung saan marami umano ang tumatakas para maligo sa ilog kahit na mahigpit na ipinagbabawal dahil na rin sa banta ng COVID-19.
- Latest
