2 ‘tulak’ todas, P14 milyong shabu nasamsam Madugong buy-bust sa Gapan City

GAPAN CITY, Nueva Ecija, Philippines — Aabot sa P14 mil­yong halaga ng shabu ang nasamsam ng pulisya matapos mapatay sa engkuwentro ang dalawang hinihinalang tulak ng ilegal na droga nang manlaban sa isinagawang buy-bust operation sa Purok 1, Barangay Sto. Cristo Sur, dito, noong Biyernes ng hapon.

Kinilala ni P/Brig. Gen. Valeriano De Leon, regional director ng Police Regional Office 3 (PRO3), ang dalawang napatay na suspek na sina Dennis Kue at Percival Miranda, kapwa ng nasabing barangay, habang nakatakas naman ang isa pa umano nilang kasabwat na nakilala sa alyas “Joel”.

Nabatid kay P/Col. Jaime Santos, Nueva Ecija Police provincial director, na nagsagawa ng anti-illegal drugs operation ang PNP at Philippine Drug Enforcement Agency-Region 3 sa nasabing lugar, pasado alas-3 ng hapon kung saan narekober ang 2 kilo at 58 gramo ng shabu sa lugar  matapos mapatay.

Natagpuan sa encounter site ang baril ng mga suspek, P100,000 boodle money kabilang ang isang P1,000 bill na ginamit sa operasyon.

Inaalam ng awtoridad kung nasa active service pa sa Philippine Army ang suspek na si Miranda matapos marekober ang isang Army ID nito. - Victor Martin