Mister pinatay ang misis, paslit na anak tinangay

KASIBU, Nueva Vizcaya, Philippines — Pinaghahanap ngayon ng mga awtoridad at ilang residente ang isang mister na tumangay sa kanyang 4-anyos na anak sa kanyang pagtakas matapos mapatay ang sariling misis sa Barangay Muta sa bayan na ito kamakailan.

Sa naantalang ulat sa pulisya, kinilala ang mister na si Gilmore Kimmayong, 44, residente ng Sitio Manua, Brgy Muta, Kasibu. 

Batay sa salaysay ng mga saksi sa pulisya, kausap umano ng suspek ang kanyang misis na si Mylene, 42, sa harapan ng bahay ng isang nagngangalang Juanita Caasi nang bigla umanong bunutin ng lalaki ang isang patalim sa kanyang baywang at pinagsasaksak ang kanyang asawa sa ibat-ibang bahagi ng kanyang katawan bago iniwanan na nakabaon sa dibdib ng misis, dakong alas 3:30 ng hapon nitong nakaraang Huwebes.

Agad na tumakas ang suspek subalit tangay umano nito ang 4-taong gulang na anak.

Nababahala ngayon ang mga kaanak sa kalagayan ng bata lalo na ang mga panganib na maaaring mangyari dahil sa pagtatago ng suspek.