2 timbog ng NBI sa human trafficking
DAGUPAN CITY, Pangasinan, Philippines — Inaresto ng mga tauhan ng National Bureau of Investigation (NBI) ang dalawang indibiduwal dahil sa pag-o-operate ng isang spa na bungad ng prostitusyon at pagbebenta ng mga babae sa mga kustomer sa Dagupan City, Pangasinan.
Kinilala ni NBI Officer-In-Charge (OIC) Director Eric Distor ang mga inaresto na sina Joseph Carrera at Gelyn Almenario sa ikinasang operasyon nitong nakaraang Lunes sa Citirock Spa sa may Arellano St., Dagupan City.
Sa ulat, nakatanggap ng impormasyon ang NBI-Dagupan District Office (DADO) sa operasyon sa ilegal na gawain sa pag-aalok ng serbisyong sekswal ng mga masahistang babae sa mga kustomer.
Nagsagawa ng surveillance operation ang NBI at nakumpirma ang ilegal na transaksyon kung saan sinisingil ang mga kustomer ng mula P1,000-P1,500 para sumiping sa isa nilang babaeng attendant. Dito nagkasa ng entrapment operation ang mga tauhan ng NBI kung saan isang operatiba ang nagpanggap na kustomer.
Dinakma ang mga suspek na sina Carrera, manager at Almenario, cashier, nang kumagat sa kanilang pain makaraang tanggapin ang bayad buhat sa operatiba. Apat na babae ang nasagip ng NBI sa operasyon.
Nakaditine ngayon ang mga suspek sa NBI-DADO Detention Center at nahaharap na sa kasong Human Trafficking sa Dagupan City Prosecutor’s Office.
- Latest
