SUV nag-dive sa irigasyon: 13 patay
TUGUEGARAO CITY, Cagayan, Philippines — Labing tatlong katao ang nasawi sa pagkalunod kabilang ang pitong paslit habang dalawa ang nakaligtas matapos mahulog sa irigasyon ang sinasakyan nilang SUV sa Barangay Bulo, Tabuk City, Kalinga noong Linggo.
Idineklarang patay sa dalawang hospital ang mag-inang Remedios Basilio, 56, at Jessabel Basilio Paycao, 27; Judilyn Dumayom, 31; Sony Puking Lopez, 22; pawang magkakamag-anak at residente ng Brgy. Bulanao, Tabuk City at si Alfredo Lope, 59, na taga-Tadian.
Ang mga nasawing paslit ay sina Cydwin, 6-anyos at Cyan, 4; mga anak ni Agtulao; Marlo Gel Perena, 6; Seadarn Dumayom, 5; Jeslyn Talawec Paycao, 4, at magkapatid na Scarlet, 3, at Ezverdcrick Basilio Paycao, 4, na mga anak ni Jessabel.
Kabilang sa mga namatay ang drayber ng SUV na si Jail Officer 1 Soy Lope Agtulao, 36, ng Bureau of Jail Management and Penology (BJMP) Baguio City.
Nabatid na ang sasakyan ay nakarehistro sa mister ni JO1 Soy na si Police Staff Sgt. Edwin Agtulao, kasapi ng Tandian Police sa Mt. Province na hindi nakasama sa trahedya.
Ang dalawang nakaligtas na ginagamot sa Kalinga Provincial Hospital ay sina Edith Andiso Perez, 51, at 10-anyos na si Cyril, isa ring anak ng nasawing kawani ng BJMP.
Ayon sa report ng Tabuk City Police, ang SUV na isang itim na Ford Everest (AAK- 9184) ay patungo sana sa Bulo Lake nang sa hindi pa natukoy na dahilan ay aksidenteng nahulog sa irrigation canal dakong alas-6:15 ng gabi. Naging pahirapan sa mga sumaklolo ang pagbukas sa nakapinid na pintuan ng sasakyan dahilan upang malunod ang mga lulan nito.
Nagpaabot na ng pakikiramay si Kalinga Governor Ferdinand Tubban sa mga kaanak ng mga nasawi. Inatasan niya ang Provincial Social Welfare and Development Office na ibigay lahat ang nararapat na tulong sa mga kaanak ng nasawi upang maibsan ang pinagdaraanan nilang pagdadalamhati. - Victor Martin at Artemio dumlao
- Latest