Motor nawalan ng kontrol: 17-anyos todas, 6 sugatan
BALATAN, Camarines Sur, Philippines — Nagkalasug-lasog ang katawan ng isang 17-anyos na binatilyo habang anim ang sugatan matapos mawalan ng kontrol ang kanilang sinasakyang tricycle at rumampa sa drainage ng kalsada sa kahabaan ng highway ng Brgy. Laganac sa bayang ito kamakalawa ng hapon.
Dead-on-the spot ang biktimang si Gregorio Magistrado Baldon habang sugatan ang mga kasamahang sina Raymark Albania Plotado,18; Jeffrey Macapad Dacoro, 21; Erwin Baldon Abalansa, 20; Dominic Nuñez Magistrado, 20; Ian Barela Culmo,19, at ang driver ng tricycle na si James Balandra Barela,17, pawang residente ng Zone-5, Brgy. Sto. Domingo.
Sa ulat, dakong alas-3:30 ng hapon sakay ng tricycle ang mga kabataan na minamaneho ni Barela patungong Balatan proper. Gayunman, pagdating sa palusong na bahagi ay nawalan ng kontrol sa manibela ang driver dahil sa bigat ng kanyang mga sakay kaya bumalandra ito sa drainage at sumalpok sa riprap ng kalsada.
Patay agad dahil sa matinding pagkaka-ipit si Baldon.
- Latest
