Gasolinahan niransak: Higit P.6 milyong tangay
CAVITE, Philippines — Isa sa dalawang lalaki ang arestado matapos na looban ang isang gasolinahan at limasin ang mahigit sa P.6-milyong halaga ng pera at mahahalagang gamit kahapon ng madaling araw sa Brgy. Molino 3, Bacoor City.
Kinilala ang nadakip na si Richard Cañedo, 41-anyos, ng Kaunlaran 2, Brgy. Molino 3, Bacoor City habang tinutugis ang isa pa na nakilalang lamang sa alias “Bay”.
Sa ulat ng pulisya, alas-2 ng madaling-araw nang iransak ng dalawang suspek ang PTT Gasoline Station na pag-aari ni Ceferina Quilala, 64. Pinagtulungang wasakin ng mga suspek ang glass door ng cashier booth at ang dalawang opisina ng gasolinahan saka kinuha ang mga pera at mahahalagang gamit nasa P666,100 ang halaga.
Ayon sa empleyada na si Leona Jean Benghit, pagpasok niya sa gasolinahan, dakong alas-8 ng umaga ay agad niyang napansin na wasak na ang glass door ng booth at kanilang opisina. Agad niya itong itinawag sa may-ari at inireport sa pulisya.
Nakunan naman ng CCTV ang pagpasok ng mga suspek sa gasoline station kaya sila nakilala ng mga awtoridad.
Sa follup operation, naaresto ng mga pulis ang isa sa mga suspek habang pinaghahanap pa ang isa pa.
- Latest
