Fitness center sa Subic ipinadlock
Sa paglabag sa health protocols
SUBIC BAY FREEPORT, Philippines — Ipinasara ng pamunuan ng Subic Bay Metropolitan Authority (SBMA) ang isang kilalang gym and fitness center sa freeport dahil sa paglabag sa umiiral na health protocols upang labanan ang pagkalat ng COVID-19.
Sinabi ni SBMA Deputy Administrator for Health and Safety Ronnie Yambao na pansamantalang naka-padlock ang Victory Gym and Athletic Club sa loob ng 2-linggo bilang parusa sa unang paglabag nito.
Ang naturang hakbang ay bunsod ng mga reklamo na nakarating sa kanilang tanggapan na mayroong mga customers ng naturang gym na hindi nagsusuot ng face mask at hindi rin umano ipinatutupad ang social distancing.
Sa ilalim ng SBMA Board Resolution No. 20-11-1843, nakasaad na mayroong kaakibat na parusa ang sinumang lalabag sa ipinatutupad na health protocols and standards. Sa unang paglabag ay papatawan ng temporary closure sa loob ng dalawang linggo habang sa ikalawang paglabag ay suspension ng Certificate of Registration and Tax Exemption (CRTE) sa loob ng anim na buwan at ang ikatlo ay kanselasyon na ng CRTE ng establisimyento.
Nagpatupad din ang SBMA Board ng multang P1,000 para sa mga indibiduwal na mahuhuling walang suot na face mask at face shield sa mga pampublikong lugar sa unang paglabag habang P2,000 sa ikalawang paglabag at P5,000 sa ikatlo at mga susunod na paglabag.
- Latest