Higit 700K Bulakenyo tumanggap ng ayuda
PULILAN, Bulacan, Philippines — Nagsimula nang tumanggap ng P1,000 cash bilang ayuda mula sa pamahalaan ang unang 735,058 na Bulakenyo mula sa pondong ipinadala ng Department of Budget and Management (DBM) sa mga pamahalaang lokal, para sa mga pinakamahihirap na pamilyang naapektuhan ng umiiral na enhanced community Quarantine (ECQ).
Kabilang sa mga unang benepisyaryo ay ang 454 na mga taga Brgy. Sta. Peregrina sa Pulilan. Isa rito si Leonardo Antilio, 72 taong gulang, isang maralitang magsasaka na nasiraan din ng mga pananim at bahay ng bagyong Ulysses noong Nobyembre 2020. Tumanggap siya ng halagang P4 na libo na pakikinabangan ng walong kasapi ng pamilya. Aniya, malaking tulong ang natanggap na biyaya upang ipambili ng kanilang pagkain dahil wala silang ikinabubuhay mula nang masiraan ng tanim.
Ayon kay Ma. Cristina Domondon, team leader at municipal link ng Department of Social Welfare and Development (DSWD), bahagi sila ng 90,027 na taga-Pulilan na benepisyaryo na nilaanan ng P90 milyon.
Batayan ng DSWD ang Local Budget Circular 136 ng DBM kung saan nagkakahalaga ng P4,000 ang ipagkakaloob sa may apat o higit pang miyembro ng pamilya habang tig-P1,000 kung isa hanggang tatlo ang kapamilya.
Sa Obando, kasalukuyan na ring ipinagkakaloob ang ayuda sa may 48,136 na mga benepisyaryo at sa 596,895 na mga taga-San Jose Del Monte.
- Latest
